Nargis tarse hai chaman mein deedawar kahan hain

Adaaab hazireen-e-mehfil...aapki khoobsoorat bisaraton ki
nazr yeh ghazal kar rahi hoon...shayed kisi qabil ho:

Nargis tarse hai chaman mein deedawar kahan hain
Ghalib-o-Meer-o-Iqbaal se sukhanwar kahan hain?

Gaon ujre shahr base aur bani azeeem imaratein
woh pagdandiyan kahan hain, woh shajar kahan hain?

Loot lete hain sub yaan apne hi khud apnon ko
Raahzan hain sub is daur mein, raahbar kahan hain?

Mohabbat par meri tujhko zara sa bhi aitbaar nahi
Dost tere hain hum sada se, sitamgar kahan hain?

Taskeen aaj phir kehne chale ho tum nayi ghazal
Radeef-o-Kaafiya lapata, wazan-o-bahr kahan hain?